Trekk eit kort

Ein leiken metode for å lære notar

Vi har alle vore der. Eleven strevar med å lære notar og vi riv oss i håret. Det fins mange innfallsvinklar til å løyse den utfordringa, og eg vil på ingen måte hevde at dette er den endelege løysinga over alle løysingar. Men den kan vere eit verkty blant mange andre i verktykassa, og kanskje det som får ein ny elev til å oppleve meistringa når notane kjem på plass.

Du treng

1. Flash-cards med notar på
2. Tid

Slik gjer du

1. Plukk ut eit knippe notar som eleven lyt repetere.
2. Trekk eit kort og sett det på stativet.
3. Lat eleven sei namnet på noten høgt. - “Dette er ein C!”
4. Finn rett grep/posisjon og gjenta pkt. 3
5. Spel noten og sei høgt: - “Eg har spelt ein C”
6. Trekk eit kort til og sett på stativet. Gjenta frå pkt. 3, med det no litt utvida utvalet notar. Det blir litt lenger sekvens for kvar gong.
7. Når du har fire notar på stativet kan du vurdere å late eleven velgje bort ein tone før du trekk det neste kortet. Styr det gjerne dersom du treng det: - “C-en er perfekt kvar gong, den kan du superbra så den tek vi bort. Trekk eit nytt kort!”
8. Du kan late eleven jobbe med tre-fire notar ei stund. Variasjonen kan komme av at du blandar dei aktuelle korta på nytt og set på stativet i ny rekkefølgje.

Poenget med denne øvinga Poenget er å ta notelesing ut av ei kjent ramme, ein melodi som eleven kan frå før eller spelar på gehør. Variasjon over ei lita mengde notar kombinert med å sei notenamna høgt vil forsterke koplinga mellom det musikanten ser og det hen skal spele på instrumentet.